Verhalen/gedichten van
Raalte (Raolte)

Zoaterdagmorgen nog te vrog veur de kraant
Vandaag bint de centen van de baas niet van blik
Een trommel vol stoete, de bouwlaampe braand
En op radio Oost al een lietie van Skik

De blokkn stoat estapeld, de specie is koald
Het is al te zien woar de kleedkamers  komp
Vief stoere kjels stoat een dag an de droad
Zie lacht um de bakkn die skuu bint en lomp

Refrein:
Niet veur mie, niet veur oe mar veur oons
Het hele dorp is an de gang
veur ‘t  algemeen belang
Niet veur mie, niet veur oe mar veur oons

Op de tekening steet hoe de hal wud e bouwd
Vanoaf de fundering tot de nok van het dak
Annie en Mans, net gister e trouwd
komt langs met het oaver gebleven gebak

Zo net noa de middag ziej wel 40 man warkn
Skoelmeister, huusarts  met  Anton en Riek
Zo mar vriejwillig ant schuldern en harkn
In’t belang van het dorp bint ze ommoa  geliek

de kraante mak foto’s het is kwat oaver vier
de slager kump langs met kit warme  balln
en doar is ok Leo met 2 krattn bier
De kop in’t vebaand hij is gistern evalln

Om zeuvn  uur’s oavonds zwig radio Oost
Het hekke geet dichte  wie trapt hum mar an
Muu mar tevreine terug noa de kroost
Volgende wekke dan goa-w weer vedan

Gerard Oosterlaar

Oktober 2011

Bron: Theaterprogramma : 'JAPPEL, WOS EN BEUNTIES' van Höllenboer

Het Stöppelhaenelied

De roggebouw is of-edaone

En ’t lääste voer is op-elään

Noe lao-wie ’t wärk en steugie staone

En viert tesämen ’t Stöppelhaene

Noe is dit zommerfees op tille

De tied van ’t riepen van ’t gewas

Wie määkt dan met mekäre wille, wille, wille

De Stöppelhaene zit in de gas

Wie määkt dan met mekäre wille, wille, wille

De Stöppelhaene zit in de gas

Dit is een fees veur boerenmeensen

Naor ’n aole stiel in Sallands laand

Wie könt oons niet wat betters weensen

Noe ’t drukke wärk is an de kaant

Een glassie zuut dät mag ’t wé kossen

Met een ende wos zo uut de pan

Bi-w gangs dan zingen wie aole lieties en gaot hossen

De Stöppelhaene die kreit dervan

Bi-w gangs dan zingen wie aole lieties en gaot hossen

De Stöppelhaene die kreit dervan

Niet neudig

Ik was lest as uutdaging met de racefiets noar mien werk egoane. Een hele trip nog, zestig kilometer. Een fietse die dag was wel handig, want wie hadden teamvergadering in een muf zaaltie eans aans in de stad.

Het was half achte det ik ankwam en dan is d'r op zo'n grote schoele nog gin meanse te bekennen. Dus ik wol mien dure racefiets snel eam met noar binnen nemmen, onder de douche springen, nog wat van mien bureau pakken en dan wear vot, noar die 'dislocatie', zoas det heet. Mar de congiërge was d'r al wel op det vrogge tiedstip en van hem moch de fietse niet met noar binnen: "Stel je voor det iedereen dat gaat doen."

Ik heb det geprobeard mar het lukken niet. Zelfs as det zol meu'ng, kon ik mie niet vöarstellen det iederiene de fietse met nam noar binnen. Wat een gekkigheid. Wat ik mie wel kon vöarstellen is een vergadering met van die papierschoevers oaver de regel: 'om te vöarko'mm det iederiene zien fietse met noar het bureau nemt, verbiedt wule det iemand zien fietse met noar binnen nemt.'

Nog een geval van niet neudig: In Utrecht kwam ik een stoer informatiebörd teeng det zei det ze ter plekke het verkearslicht uut ezet haa'n in verband met een proef onneudige verkearslichten ok echt te verwijderen. Kennelijk hef de gemeente Utrecht papierschoevers in dienst met de neiging onneudige verkearslichten neer te zetten.

Ok niet neudig: Ik höaren van een schoelhoofd die zien meesters verboden had korte broeken te draa'ng op het werk, "want ie mut netties vöar de klasse stoane". Een korte broek is dus niet netties? En al het andere dus wel? Ik zol bierboeken, slechte make-up, goedkope Makro-pakken en geverfd hoar dan earder verbieden.

De hoofdvroage is natuurlijk niet wat netties is, de hoofdvroage is hoe ie het beste lesse geeft. As ie doar oe personeel op ofrekkent, kös de docent as onderdeel van zien professionaliteit zelf wel wulke kleare doar bie höart. Mar ja, dan mut ie wel verantwoardelijkheid bie een aander nearle'ng.

Det is pas lef he'mm: een eindverantwoardelijke die zien meansen optimaal verantwoordelijk maakt. Det durft regelgevers niet, mar det leavert wel het beste resultaat!

Denne van Knöldert (ps. van Harrie Kiekebosch)