Hier vindt u meer informatie over de cursus streektaal en streekcultuur, en het inschrijfformulier.

> lees meer over de cursus
> schrijf je in voor de cursus

Verhalen/gedichten van
Vroomshoop

Gebedsgenezing

Nog niet zo lange terugge ha’j in de kleane dorpen ok nog van dee geneuglijke kleane dorpsschoelties. Zo ok biej mien zwoager op ’t dorp. Toen hij de wichter op schoele had vreugen ze hum ok dreks al in ’t bestuur. Hee stun niet te springen, mar veulen zich wel verplicht ja te zeggen. In zo’n kleane gemeenschop doe’j wat. Nou is Jan-Peter een echte haandarbeider. Een besten timmerman. Wat hij zöt dat könt zien haanden ok maken, mar in bestuurlijke zaken is e zwakbegaafd en dat is e.

Drie dagen veur een bestuursvergadering kreupen de zenuwen hum al in de nekke en helemoal as e ‘s oavends an de beurte was um het openingsgebed te doen. Hij wol ’t neet op papier zetten, mar in ‘t  heufd had ‘t wel zo’n betie op de riege e zet wat hij allemoal zol zeggen en zol vroagen zo achter de pette boven de gevoalden zweterige haanden. Hij stotterden nog net niet, mar doar ontbrak mar naar weanig an. Hij dreug in zien gebed wichter en personeel op an zien Chef doarboaven en vreug dringend um genezing van de directeur van ’t schoeltie den al meer dan een half joar ’t slim te pakken had. Met een diepe zucht -zie zo, dat he’k ehad- deu-r-e de ogens lös um dan, o wat skamen e zich, tot de ontdekking te kommen dat de directeur in heugst eagen persoon al wier blakend noast hum zat. Woarnoa Jan-Peter ietwat veurzichtig earlijk bekeanden dat hij nooit eweten had dat gebedsgenezing zo rap in zien wark gung.

Mar an hardop veurgoan in gebed hef e zich nooit meer ewoagd en dat hef e niet!

Thea Kroese
Vroomshoop